फलटण मधील आचार्य बाळशास्त्री जांभेकर माध्यमिक विद्यालयात एक अनोखा संवाद रंगला होता. निमित्त होते पर्यावरण संरक्षण आणि पाणी बचतीसाठी नैसर्गिक पानांच्या पत्रावळी यांच्या वापरास उत्तेजन देण्याच्या व्याख्यानाचे. विद्यार्थी विद्यार्थिनींचा अपूर्व उत्साह पाहून नेहमीप्रमाणे व्याख्यान न देता प्रश्नोत्तरे आणि मुक्त संवाद असे कार्यक्रमाचे स्वरूप ठेवले गेले. थं क्रिएटिव्ह पर्यावरण दक्षता कृती मंच चे संस्थापक श्री प्रशांत अवचट यांनी पर्यावरण आणि पाणी बचत हा धागा पकडून विद्यार्थ्यांशी अनौपचारिक संवादाला सुरुवात केली. काही क्षणातच कार्यक्रमाला “पर्यावरण गप्पा” असे स्वरूप प्राप्त झाले. पर्यावरण, पाणी बचत, प्लॅस्टिक प्रदूषण आणि विशेषतः नैसर्गिक द्रोण पत्रावळी यांचा वापर यांविषयी विद्यार्थ्यांनी मोकळेपणाने अनेक प्रश्न विचारले. त्यांची समर्पक उत्तरेही त्यांना मिळत गेली.
वारी मध्ये भोजनासाठी नैसर्गिक पानांच्या पत्रावळी यांचा वापर जास्तीत जास्त व्हायला हवा हा संदेश अधिकाधिक लोकांपर्यंत पोचविण्याचा निर्धार विद्यार्थी, विद्यार्थिनींनी केला. यासोबत टाकाऊ प्लॅस्टिक कचरा आणि पिण्याच्या पाण्याच्या रिकाम्या बाटलीचा वापर करून जास्तीत जास्त इको ब्रिक्स तयार करून त्या शाळेत जमा करण्याचाही निर्धार विद्यार्थी विद्यार्थिनींनी केला. कार्यक्रमाच्या यशस्वितेसाठी शाळेचे शिक्षक, शिक्षिका यांचे सहकार्य लाभले